By Rev. H.Manga Khongsai
Tlumte thlira ei lo thlir, Gospel Centenary Celebration (1910-2010), Senvon, Kohran dang dang inzawm khawma lawm chu Pathien Thlarau Thienghlim pawlna hnuoiah ropuitaka hmangzo a ni ta a. A chanchin mitinin ei hriet nuom seng ka ringa, a tlangpui chau report hung peng ka ti:
1. Mikhuol fe popo zat: Sangsarih zanga leh sangriet inkar nia hriet a nih.
2. Ruoithre mihriem zat: Singkhat sangkhat za le sawmhni pariet.
3. Ruoithre nia bufai suong zat : Bag 124
4. Sa bel suong zat: Khapriet le khap kuo ngawt 87
5. Sa suongtu (tucha) popo: Mi 317
6. Ran that zat: Pum 317, a rengin Quintal 50
7. Senvon khuoa inthawka Pastor suok zat: 87
Programme tran zan (21/01/2010) a inthawkin Kohran intranna Ni Pentecost boruok khan a hung hluosip nghal ni takin an lang. Ei ram Kohran hung pieng dan le Mizoram Synod hin inzawmna lo nei rak naw sienkhawm, Chanchin Thra hung phur luttu Watkin R.Roberts, Sevon a pan ding tawma trongtraia an inthlana Aizawl, Mission Veng Biekin ruokchu, ei bul tranna a ni ti hrie zingin, an Kohran Upa, Prof. Laltluangliana (Rev.Liangkhaia tupa) ngei chun, Hall sunga var popo suk thim vong a ni laiin Chanchin Thra entirna Meiser sitin Hall lien tak sunga chun a hung pei a, Chu Meiser chu Senvon Lal ai-awin a tupa, Pu, PK Singsonin a lo dawng sawnga, Chutaka inthok chun ringtu hmasa sung le kuo haiin dong peiin Pastor haiin dep kai peiin, “ mei anga inlara indarin” ti ang el khan inkhawm mipui po po kuom a thlung ta a ni. Meiser hung luta inthawka Hallelui le Amen thawmri tawp thei lo hai chun, ei lawmna a suk famkim zuol bawk a ni.
Watkin R.Roberts ro khawmtu, Dr. Rochunga Pudaite hai nupa Helicopter-a hung vuonga, hnuoi a hung trum hmaa Senvon khuo vawihni lai zet a hung hel kuol meu khan chu Senvon khuo chu an hning in an hning ta a, vuongna trum hmuna fekhawm mipui tam zie chu Sap In tlang tieng chu ei hei ena, thinghna hlohna tak ngiel khawm inlang thei ta lo khopin mihriemin a sipin a sip el chu a ni. Pathien ropui rawse.
A nipui nitak Dt. 23.01.2010 a hung inhersuok meu khan chu Chanchin Tha Khuongpui leh Dar vawi 100 hung inri chun mihriem lungril sungah hun thar, ni thar a hung inher suok pui ta a, Pathien mi hmangai nasat zie puonglanga um chun hril suok thei lovin mitin sungrilah thu a hrila, Centenary lung, Watkin R.Roberts-a lim (Bust) le Centenary Chapel hawngna hai Pu. Rochung in a nei zovin, Aizawl District EFCI in a lo buatsai CHANCHIN THA MEISER THI THEILO, hring zing CHANCHIN THA JOHAN ZIEK BUMAL 1898 a Lusei tronga Londona sut, Senvon Lal Pu, Kamkholunin “Pu nang ngei hung la mi hung hrilfie pek rawh” a lo ti, ei ram ei hnam elvartu ngei kha, a lo phurluttu indik tak, an nau le te ha’n bawma hungzawn in, Lal sungkuohai kuoma inhlanna neiin, Senvon Lal tupa, Pu Vanlalvulin Kohran popo ai-aw, Centenary celebration kuomah inhlan nawkin a tawpah, Dr. Rochunga Pudaite in Jordan vadunga inthoka lak ngei lung 12 huol vel, a laitaka khun taka siena a nei zovin, Aizawl EFCI Choir han “Chanchintha zara malsawmna-Aw Pathien nangma Chanchin Tha zarah, lawmthu kan hril che” ti hla hring em em le mawi em emin an hung saka, Pu Tlangval in Senvon khuo lailungtaka, a Bible chang tiem Johan 3:16 na khalaia Johan bumala mi, a ziek ang angin kha Lusei trongin, “Jihova’n khawvel a hmangai em em, chutichuan a Fapa mal nei chhun a pe a, ama chu tupawh a ring apiang an boral lo vang a, chatuana nun an nei nan” mipuiin a ruola vawihni tiem nawnin, chu zovah, Pathien kuoma lawmthu hrilna le ama chawimawina in, Johan 3:16 ziekna phek po Xerox kha mipui in chungltienga lekin, Hallelui vawithum vawr a na, a ropui zie chu, van trong hei hmang thei nilang chu Pathien sinthaw ropui zie hi hril suok zo thei chau ka tih. Chutak chu Chanchin Tha meiser thi theilo chu a nih.
Mipui khang zo zaiin a ruola iengkhawm buoi um der lova, minute 20 sung vel chauva ruoi an hei thre zo el hai dam, Thingtlang khuo iengkhawm facility um lova, khangang Programme lien tham fel fai taka an hei thaw el thei hai dam, Thingtlang khuoa mikhuol khang zo zai hne taka an lo mikhuol el thei zie hai le zurui hmel le lungawinaw hmel hmu ding le hril ding um lo, a tar a zur Thlarauva sipa hlimna le lawmnaa a sip el zie hai hei enin a mak tina ding a lo tam ngei! Gedeon Prayer Walk haiin January ni 11 a inthawka ni Jan 20th chen trongtraia hma an lo thruoina hai hin umzie a lo va nei lawm lawm ngei de! Chanchin Thra mansapui bangna Senvon khuo a Centenary lawm hi Pathien lawm zawng le a programme a lo va ni lawm lawm ngei de! Mitin ei fe theinaw khawmin, a fetu haia inthawka Chanchin Thra lawmum lo dawngsawng ngei dingin ei infiel tak zet a ni. Thlarau thara a rawng ei bawla Chanchin Thra hi luipui anga luonga luong dar pei dingin Rock Barak River Programme ropui tak, mi tumru le mi tlawmngai Lalpa sipai huoisen, Dr.Pudaite inrawina hnuoia Thralai ruol mi 700 haiin an nei mek hi Lalpan nasa takin malsawm sienla, hi Centenary hung tlung hi nasa nawk zuola a rawng ei bawl theina dinga Inpumpekna Thar (New Commitment) mi siem pektu ni raw se.
Loading ...